evbazari-logo

Zebra tortunu ailəcə çox sevirik. Hər dəfə bu tortu sobadan çıxardıb kəsdiyimdə, əvvəlcə ona bir xeyli müddət valeh olmuş gözlərlə baxıram. Yox yox¸ məni valeh edən tortun necə yaxşı bişməsi deyil¸ əsl zebranı xatırladan ağ-qara zolaqların gözəlliyidir.

Bu zolaqları “yaratmaq” göründüyü qədər çətin deyil. Prosesi sizin üçün daha da asanlaşdırmaq üçün tortun hazırlanmasını addımbaaddım çəkdiyim şəkillərlə izah edəcəyəm. Tortunuzu “zebralaşdırmaq” istəyirsinizsə¸ buyurun, mənə qoşulun. Peşman olmazsınız:)

ZEBRA TORTU

Ərzaqlar

4 yumurta
1 stəkan (250 qram) şəkər tozu
1 stəkan (250 millilitr) süd
1 stəkan (250 millilitr) bitki yağı
2 stəkan (250 qram) un
1/3 çay qaşığı vanil tozu
1 çay qaşığı soda
2 xörək qaşığı tünd kakao tozu

1. Dərin bir qabda yumurta və şəkər tozunu mikserlə rəngi açılana qədər çalın. Süd və yağ əlavə edin və yaxsı qarışana qədər çalmağa davam edin.

2. Ayrı qabda unu¸ vanili və sodanı qaşıqla qarışdırın.

3. Unlu qarışığı tədricən yumurtalı qarışığa əlavə edin və mikserlə ərzaqlar yaxşı qarışanadək (təxmınən 10 saniyə müddətində) çalın. Əldə etdiyiniz kütlə nə çox qatı, nə də ki çox duru olmalıdır. Şəkildə gördüyünüz kimi.

4. Alınan qarışığı iki eyni hissəyə bölün. Bir hissənin üzərinə kakao tozunu əlavə edib qaşıqla yaxşıca qarışdırın.

5. Sobanı 180˚C-dək qızdırın.

6. Diametri 23 santimetr olan yumru tort formasını azacıq yağlayın və dibinə perqament kağızı sərin. Ağ qarışıqdan 3 xörək qaşığı götürün və formanın ortasına tökun. Üzərinə (ortasına) 3 qaşıq kakaolu qarışıqdan tökün. Şəkillərdə gördüyünüz kimi. Qarışıqlar qurtarana kimi eyni şəkildə dəyanmadan davam edin. Qarışıqları yaymayın¸ formanı tərpətməyin – xəmir öz-özünə yavaş-yavaş yayılacaq.

7. Tortu sobada 40 dəqəqə müddətində bişirin. Sobanı ilk 20 dəqiqə ərzində heç AÇMAYIN, yoxsa tort qalxmaz. Tortun hazır olub olmamasını yoxlamaq üçün içərisinə kibrit batırıb çıxardın – çıxan kibritə xəmir yapışmayıbsa¸ tortunuz hazırdır. Tortu formasından çıxardın və soyumağa qoyun. İstəyən soyumuş tortun üzərinə şəkər nişastası səpə və yaxud da shokoladlı qlazur yaya bilər.

Mənbə: azcookbook



Reklam

Dostlarınla paylaş